إيمان حافظ تكتب: في حب مصر تحلو الكلمات
قال الله تعالى:
{وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الإِثْمِ وَالْعُدْوَانِ}
(المائدة) صدق الله العظيم
و فى حب مصر تحلو الكلمات
و يبقى عشاق مصر هم بناة مصر
اتربينا على المحبة ولمة العيلة والجيران
اتجمعنا عيلة كبيرة قرايب من دم واحد هو شريان الحياة
شريان حياة مصر
شمسها ونيلها وحلاوة نص طماطماية حتة جبنة قريش والبتاو
ونقوم شاكرين الرحمن
وزايد فينا الإيمان
ما هى لقمتها
من جذور أرضها
هى اللى بتشبعنا
هى اللى بتروينا
ومهما تعبنا واتغربنا
نفتكر ابتسامة حلوة فى ملامح بهية
نطمن زى الأطفال
إننا مهما بعدنا
عايشين بكل وجدانا
بحس بلدنا الحلوة بهية أم الدنيا يا حلوة يا مصر
ياحنونة على ولادك بحضنك الدافى اللى بيجمع و مايفرقش
اتربينا على الفطرة الجميلة
على بديهيات حوالينا حضنتنا
دفتنا و ضحكتنا ولمتنا على أبسط الحاجات
وأبسط الحاجات لازم تخليك برضه تحب مصر
مش من دروس بس حببتنا فيها
إحنا عشنا الحب بيها وفيها وليها
مصر بلدنا هى الهوا والميه اللى بتروي العطشان
دافية حنونة زى حضن الأم لما يضم ويطمن
هى الزاد والزواد.
ونغمة حنونة آخر اليوم بتعزفها جميلة من بنات مصر
على الأوتار بتعزفها نغمات حياة
مصر ما اتغيرتش يا أهل مصر
إنتوا وإحنا و اللى راحوا واللى لسه جايين بأمر الرحمن
الكل بيجرى على نيل مصر ، يحتمى بشطك يا سمرة يا ست الملاح
وكل كلمة بنكتبها عن مصر
هى نفس وتنهيدة قدام لحظة
صفيت فيها السما و نادت الأمل اللى ساكن فى عيونا
وورق الورد لسه مندي على شط النيل
و لسه بيزين أرضها السودا العامرة بالخيرات
ولما يدبل
نلاقيه زى العطر المنثور يزيدها خصوبة
واللى راح …
يرجع مكانه الأحلى
والأحلى دايما فينا
ما إحنا عايشين بحسها
حس الغناوى
اللى من غير قصد
بتترعش بيها عروقنا
ندفى ونبرد
ونتوه فى الطريق
بس مطمنين لإن مصر عمرها ما باعت ولادها
واللى باعها رجع مكسور ندمان
وبرضه حضنته و طبطبت عليه وإديته الأمان
ومحبة ناس مصر
بس ناس مصر ما بيسامحوش الخاين
ودلوقتى وقت الندا الأكبر من أجل استمرار عجلة الإنتاج
إنتاج وصناعة مستقبل مصر المشرق وهنا جه الميعاد
والميعاد دايما ميعاد عمل ومشوار
نرد لأجدادنا فراعنة مصر الجميل
نقولهم إحنا قادرين بعون الله نستحمل و نشتغل
ونحافظ ونزيد من أمجادك يا مصر
الكل يضحي ويشارك ويبنى مع اللى جنبه
يبني هو بيته لحظة إيد بإيد عزيمة و قوة
دفا وحنان يجمع كل الناس
و نطبطب بإيدين حنونة ونطمن بعض
متونسين ببعض فى أمان
الكل يصحى
شايل شنطته
شايل مخلته
رايح الميدان
ميدان البناء والمستقبل اللى جاى ببشايره أقوى
أول حضارة وحتى يوم الدين تبقى برغم المئات
من آلاف السنين تبقى *مصر *أم الدنيا
تبقى أرض العطاء الخصبة
الأرض التى يتدفق الخير فى شراينها نهرا وارتواء
تتولد به الحياة
حياة الإنسانية والتحضر
الواقع اللى كان صعب
بس قررنا كلنا بدون اتفاق إننا نتحداه
ونبنى مع اللى بيبنوا
حتى آخر نفس فى أعمارنا
حبا وعشقا فيكى يا مصر
مصر يا بهية
ولا تتغنى غير ليكى
ولا نحسها غير وإحنا فارشين السجادة جنب نيلك
ناكل من خير عطاياكى.
ولا نعطش برغم نيران البشر
وإزاى نعطش وإنت نيلك لا يتعاند
ولا يقدر حد يوقفه ليوم الدين
نيلك هو هبة الرحمن
وتفضلى يا مصر حلوة ومتزوقة
حاضنة ولادك بحنانك
ووقت اللزوم بقسوة الحرمان
وآدى الأوان ابتدا
الأوان بقى ينادى كل ولاد مصر تعالوا اتعبوا معانا
علشان وقت جنى الثمار تفرحوا معانا
تعالوا خلوا الكل يجرى يحقق دوره فى بناها
ويقف فى الصف مع اللى سبقوه
إيد على إيد وكف بكف وروح الغناوى بتورينا
حنين وعزم وإصرار على النجاح
بنغنيها كلنا
أصل مصر
أم الأوطان
أرضها هى الخير كله
ومع إن فيه حضارات وقعت واتوأدت فى ترابها
بس مصر
تفضل بخيرها وحنانها ودفا شمسها
الروح للشريان
وإحنا عايشين فيكى يا بلدنا الحلوة يا مصر
ونصحى نغنيلك غنوة بسيطة ساكنة القلب
بفرحة وضحكة تشرق جوانا بأمل وعزيمة
ولاتدبل ولاتموت إنما بيتجدد فينا الأمل
