حذرت إحدى الأمهات عبر صفحتها على موقع التواصل الاجتماعي فيس بوك الجميع من أسلوب جديد يتبعه خاطفى الأطفال لاتمام مهمتهم الدنيئة دون ان يشعر أحد فقالت ”لكل الأمهات تحذير من أسلوب خطف الأطفال الجديد
الكلام ده عن تجربة شخصية حصلت معايا انا وزوجي وابني من يومين
دخلنا احنا الثلاثة محل ملابس … مفيش دقيقة ولقينا شاب شكله مهذب جدا عمال بيهزر مع ابني والمحل كان مشغل أغاني فكان بيحاول يخليه يرقص معاه ( ابني عنده 3 سنين ).
الشاب كان معاه طفل تقريبا في سن ابني أو أكبر منه بسنة برضو نضيف جدا فضل يقول للولد أمسك ايد اخوك وارقص أجروا وانا هجري وراكم وطبعا اطفال بقوا يجروا ويضحكوا ويستخبوا في الهدوم انا شايفة كل ده من بعيد وواخده بالي ومش مطمنة … زوجي الحمد لله رب العالمين ذكي راح واقف في الممر اللي عند الباب وبيراقب الموقف بس اللي هو محدش يعرف يخرج من المحل إلا لو هو خد جنب
المهم قولت لنفسي نمشي احسن لاني وزوجي مش مطمنين وطبعا فضلت أجري ورا ابني علشان امسكة والشاب ده يقوله اجري الحق استخبى هاتاخدك
ولما مسكته بيقوله لاء تعالى مع صاحبك علشان تلعبوا سوا
كل ده بهزار وضحك وطبعا إحساس تحفز مني ومن زوجي ومفيش أي حاجة ملموسة ممكن نعمل عليها مشكلة
بعد ما مشينا وروحنا البيت بنحكي لواحد قريبنا في جهة أمنية قالي ده أسلوب جديد في خطف الأطفال يبقى معاهم طفل ويلعب مع الطفل التاني وياخدوا الطفلين ويمشوا
ونسأل الله العفو والعافية ربنا يحفظ أولادنا جميعا ”
وكانت هذة الرسالة مؤثرة جدا في نفوس الامهات حتى بدأن يتناقلن الحديث عنها في منتديات الامهات لتحذير بعضهن البعض.
