وجهت “ريهام” إحدى رواد مواقع التواصل الاجتماعي رسالة لطلاب الثانوية العامة لعدم حزنهم على عدم الالتحاق بالكلية التى يرغبون وقالت”انا ريهام، جبت ٩٧٪ علمي علوم في الثانوية العامة، كان حلم حياتي ادخل صيدلة، و مجتليش و جاتلي (ألسن عين شمس)(الرغبة ال٤٨ و الاخيرة)
اكتئبت و زعلت و قررت اخد الريسك و ادخل قسم (كوري و مجري)
سبحان الله دي كانت احسن حاجة في حياتي
١/سنة تانية كلية( سافرت المجر منحة )
٢/ سنة تالتة كلية (سافرت كوريا منحة)
٣/ سنة رابعة كلية (سافرت المجر سنة منحة )
٤/ بعدها بسنة رجعت مصر اشتغلت في الترجمة و مصانع و ارشاد و ترجمت مع فرق رياضية في كذا بطولة دولية
٥/ بعدها بسنة جالي شغل في ماليزيا وحالياً انا هناك للسنة التانية….
انا اشتغلت من سنة اولي لحد دلوقتي يعني ٦ سنين
ترجمة، مصانع ، درست مصريين كوري و كوريين عربي في مصر و ماليزيا و المجر
سافرت٢٠ دولة ولو كنت دخلت صيدلة مكنتش رحت فأي مكان عشان كان هيبقي لازم اذاكر اغلب الوقت بس من غير ما اتدرب بالشكل الصحيح
الحياة مكنتش رغد و حلو بس ف٧ سنين، كان فيها غربة و مرض و حوادث و فقد ناس و فقد احلام تانية و حاجات كتير اوي ضريبة للايام الحلوة
المهم:
اول حاجة: قول الحمدلله فكل وقت و علي كل حاجة
الحياة صعبة لوحدها فحاول تشوف الكويس و الحلو اللي جوة المر❤️
تاني حاجة: الثانوية العامة مش مقياس لأي حاجة غير انها بتقييس انت قدرتك في انك تذاكر لأخرك قد ايه
تالت حاجة: اشتغل اي حاجة تيجي قدامك هتتعلم منها مهما شايفها
ملهاش قيمة!
رابع حاجة: استفيد من الجامعة قدر الإمكان ، سواء دراسة، او انشطة، ذاكر انجلش حلو و كمبيوتر و متنساش الإكسيل في كورساتك.
انا اتعلمت من السفر الاي متعلمتوش في حياتي كلها في مصر
نصيحة للاهالي : سيبوا عيالكم تشتغل و تتعب و تسافر و تتعلم مش هتندموا لما تلاقيهم بقوا رجالة و بنات ب ١٠٠ راجل”
وقد لاقت هذة الرسالة أثر نفسي إيجابي كبير في نفوس مرتادي مواقع التواصل الاجتماعي ما جعلهم يتبادلونها.
